Kuntatt Ġdid f’Kiratina (Kenja)
15 October, 2023
Il-Membri u l-Kandidati tal-Qasam ta’ Ruiru, flimkien ma’ Philip Bezzina KEĠ, żaru Kiratina Outstation iddedikata lil San Ġorġ Preca nhar il-Ħadd 3 ta’ Settembru 2023. Kiratina hija żona madwar 13-il km ‘l bogħod minn Ruiru u hija parti mill-parroċċa Juja Farm ddedikata lill- Preżentazzjoni tal-Mulej u mmexxija mill-missjunarji Mariannhill.
Matul iż-żjara, il-Membri qasmu informazzjoni dwar il-Fundatur u s-Soċjetà, filwaqt li xi Kandidati qasmu l-esperjenza tagħhom tal-Qasam f’Ruiru. Il-Membri imbagħad stiednu lill-mexxejja tal-Kiratina Outstation biex iżuru l-Qasam ta’ Ruiru. Iż-żjara saret nhar il-Ħadd 17 ta’ Settembru. Apparti li l-grupp ra l-binja tal-Qasam, saret sessjoni ta’ mistoqsijiet u tweġibiet mal-Kandidati dwar l-esperjenza tagħhom fil-Qasam. Imbagħad Mario Bezzina u Philip Bezzina qasmu riflessjonijiet dwar San Ġorġ Preca, dwar it-twaqqif u l-missjonijiet tas-Soċjetà. Is-Superjur Tonio Callus fl-aħħar qasam informazzjoni dwar l-appostolat li qed isir fil-Qasam ta’ Ruiru. Wara kompliet diskussjoni informali waqt ftit ħin soċjali.
Wara aktar diskussjonijiet u laqgħat, l-Qasam beda appostolat f’Kiratina fil-15 ta’ Ottubru 2023. Il-Membri reġgħu żaru l-outstation, u Dun Nicholas, il-kappillan, ħabbar li l-Qasam se tibda tagħmel sessjonijiet ta’ katekiżmu u formazzjoni tal-fidi kull nhar ta’ Ħadd.
Il-Qasam jirringrazzja lill-Mulej ta’ din l-opportunità biex Ġesù jkun aktar magħruf u maħbub.
