Assoċjati – Malta

L‑għan tal‑Grupp San Ġorġ Preca huwa dak li darba fix‑xahar ilaqqa’ flimkien lil dawk il‑persuni kollha, ta’ kull età, li jixtiequ jkomplu jsiru jafu aktar dwar il‑Fundatur tas‑Soċjetà San Ġorġ Preca. Jisimgħu riflessjonijiet fondi fuq kitbietu, diskorsu, kif ukoll dwar episodji f’ħajtu, u ħafna aktar. Għal uħud dawn jafu jkunu tifkiriet ħelwin, tiġdid tal‑memorja, għax ikunu semgħuhom qabel, imma għal oħrajn ikunu ġodda fjamanti, friski … kif jibqa’ dejjem ġdid u frisk it‑tagħlim ta’ San Ġorġ Preca. Għax kull kelma, frażi, li lissen jew kiteb, minkejja l‑ħafna snin li għaddew, jibqgħu dejjem jgħoddu għaż‑żminijiet kollha.

Naturalment meta wieħed jisma’ xi ħaġa sabiħa, interessanti, u li fuqu tħalli ċertu effett, minn awl id‑dinja, ifittex jara kif se jwassalha, jaqsamha ma’ ħaddieħor. U hawn fejn jilagħbu parti importanti l‑kelliema li jiġu mistiedna għal dawn il‑laqgħat. Ma jindirizzawx lil dawk preżenti lekċerers “komuni”, għalliema li ġew jagħtu lezzjoni u daqshekk … iżda persuni, membri tas‑Soċjetà, ta’ kull età, li kapaċi jfornu lil dawk li jattendu b’tagħrif li jkabbar l‑għarfien tagħhom tal‑kobor ta’ dan il‑qaddis. Kif ukoll inissel fl‑udjenza, jew aħjar ikattar fiha, l‑imħabba lejn San Ġorġ Preca u lejn kulma ħallielna. Esperjenza li fuq kollox dawn is‑soċi daqu huma stess. Allura, fl‑istess ħin qed jgħallmu lil dawk preżenti kif huma stess issa jistgħu jwasslu lil San Ġorġ Preca lil ħaddieħor.

Attività oħra li jorganizza dan il‑grupp hija irtir ta’ ġurnata fiċ‑Ċentru tal‑Konferenzi tal‑MUSEUM, Dar il‑Ħanin Samaritan, li ġeneralment isir f’nofs il‑ħarifa, fejn l‑attendenza tkun tajba ħafna. Forsi fi tfulitna u żgħożitna, meta konna membri tas‑Soċjetà, konna nattendu għal attivitajiet simili għax konna nħarsu lejhom bħala ħarġa, break, fejn nistgħu nilagħbu u nieħdu gost ma’ sħabna ’l bogħod mill‑ambjent tas‑soltu, mill‑oqsma li fihom nattendu. U għalhekk, forsi għax konna għadna xi ftit moħħ ir‑riħ, dak li konna nisimgħu, u li suppost tgħallimna waqt dawn l‑attivitajiet, kien jieħu t‑tieni post wara l‑gost li nkunu ħadna. Iżda llum, li lħaqna ċerta età, okkażjonijiet bħal dawn inħarsu lejhom mod ieħor u jgħinuna mhux ftit f’din il‑mixja tagħna ta’ fidi. Mixja li kultant ukoll ikollha bżonn waqfien. Waqfien matul il‑mogħdijiet iebsa li minnhom ngħaddu u fihom inħossuna xi ftit dgħajfa. Fadlilna ħafna x’nitgħallmu u nieħdu lura magħna minn attivitajiet bħal dawn.

Min jixtieq iktar informazzjoni dwar il-Grupp San Ġorġ Preca mitlub jikkuntattja lis-Segretarju Ġenerali fuq [email protected] jew fuq 22290333.