Assoċjati – Perù

Il-grupp tal-Assoċjati Comunidad Jorge Preca huwa grupp ta’ rġiel u nisa, ħafna minnhom miżżewġin, li jiltaqgħu kull nhar ta’ Tlieta fil-Qasam biex jitolbu u jitgħallmu flimkien dwar temi differenti bħall-Bibbja, bijografiji tal-qaddisin, l-ispiritwalità tas-Soċjetà u l-dokumenti tal-Knisja tal-Amerika Latina. Huma jagħtu wkoll daqqa t’id fl-appostolat tal-Qasam. Membru tal-grupp jgħallem il-katekiżmu lill-adolexxenti fil-kappella Virgen del Carmen f’Mamacona kull nhar ta’ Ġimgħa flimkien ma’ Membri oħra tal-Qasam. Oħrajn jgħinu fit-tħejjija tal-kolazzjon offrut lit-tfal u l-adolexxenti l-Ħadd filgħodu wara l-quddiesa. Xi wħud joffru biex inaddfu partijiet tal-Qasam filwaqt li oħrajn jgħinu spiritwalment billi jitolbu għas-Soċjetà. Darba jew darbtejn fis-sena l-grupp jorganizza ħarġa li tgħin biex jinbnew u jissaħħu r-rabtiet bejn il-membri tal-grupp. Irtir ta’ tmiem il-ġimgħa jiġi organizzat ukoll speċifikament għal dan il-grupp darba fis-sena fi tmiem il-ġimgħa f’Ottubru.