Isidoru Bakanja twieled fil-Kongo, bħala parti mit-tribù tal-Boangi, bejn is-snin 1880 u 1890. Minn età żgħira, huwa kellu jaħdem bħala bennej jew fl-għelieqi biex ikun jista jgħix. Ikkonverta għall-Kristjaneżmu fl-età ta’ tmintax-il sena grazzi għall-kuntatt tiegħu mal-missjunarji Ċisterċensi (Trappisti). Wara li kkonverta, Isidoru uża t-talenti tajba tiegħu ta’ katekist kull fejn kien, inkluż fuq il-post tax-xogħol tiegħu fl-għelieqi ta’ Ikili (fejn ikabbru s-siġar tal-latex). Tant hu hekk li sidu, li kien kolonjalist, waqqfu milli jkompli jgħallem it-tagħlim nisrani lill-ħaddiema sħabu, waqt li qallu: “Se ġġiegħel lir-raħal kollu jitlob u ħadd ma jaħdem!” Fit-22 t’April tal-1909, is-supretendent tax-xogħol qaċċatlu minn għonqu il-labtu kannella tal-Madonna tal-Karmnu, li Isidoru kien jilbes bħala espressjoni tal-fidi Nisranija tiegħu, b’mod partikolari għad-devozzjoni tiegħu lejn Marija. Is-supretendent ordna li Isidoru jiġi msawwat mitt daqqa b’mod brutali sakemm jibda jnixxi d-demm. Wara li qala’ dawn il-mitt daqqa, saħħtu marret lura ħafna. Lil wieħed minn dawk li żaruh fl-aħħar jiem ta’ ħajtu kien qallu: “Jekk tara lil ommi, jew jekk tmur għand l-imħallef, jew jekk tiltaqa’ ma’ xi qassis, għidilhom li qiegħed immut għax jiena Nisrani.” Il-Beatu Isidoru ġarrab it-tbatijiet tiegħu b’sabar kbir, filwaqt li ħafer lil min kien għamillu l-ħsara. Hekk kif kien qiegħed imut, kien jgħid spiss: “Meta nkun fil-ġenna, nitlob ħafna għalih.” Bħal Santa Tereża ta’ Lisieux, Isidoru xtaq li wara mewtu, mill-Ġenna jibqa’ jagħmel il-ġid lill-bnedmin fuq l-art. Il-Beatu Isidoru Bakanja miet b’effett tal-ġrieħi kbar li kien ġarrab bħala ‘kastig’ għall-fidi tiegħu, fil-15 t’Awwissu tal-1909. Miet bil-kuruna tar-Rużarju f’idu, liebes il-labtu kannella tal-Madonna tal-Karmnu. Huwa ġie bbeatifikat mill-Papa San Ġwanni Pawlu II fl-24 ta’ April tal-1994. Mill-ħajja tal-Beatu Isidoru Bakanja nistgħu nitgħallmu diversi virtujiet importanti: 1) Il-kuraġġ: Isidoru, bi qlubija ddefenda l-fidi tiegħu minkejja t-theddid, it-tbatija u t-trattament aħrax li ġarrab. 2) Il-maħfra: Qabel ma miet, huwa ħafer lil dawk li kienu ttrattawh b’mod ħażin, u wera mħabba Nisranija kbira. 3 ) Il-perseveranza: Huwa ġarrab l-uġigħ u l-inġustizzja mingħajr ma ċeda jew abbanduna l-valuri Nsara tiegħu. 4) L-umiltà: Isidoru Bakanja għex ħajja sempliċi u qeda lill-oħrajn mingħajr ma fittex tifħir jew rikonoxximent. 5) Il-fedeltà lejn Alla: Huwa baqa’ fidil lejn it-twemmin Nisrani tiegħu anke meta ġie ppersegwitat minħabba fih. Isaac Zammit Kandidat

Il-filosfu Grieg Aristotli kien iqis il-ħajja tal-virtù bħala l-hena nnifsu. Mitejn sena wara, filosfu ieħor, Ċiċerun, sostna li “l-virtù hija l-premju tagħha nfisha”. Tabilħaqq, hemm premji umani universali (kuxjenza safja, kuntentizza u rispett lejna nfusna) li jiswew aktar mill-unuri, mit-tifħir jew minn kull kumpens materjali. Madankollu, il-premji ta’ ħajja virtuża ma jinkisbux faċilment. Min jgħix ’il bogħod mill-inkwiet u minn dak kollu li hu spjaċevoli jista’ faċilment jikkonvinċi lilu nnifsu li huwa virtuż. Iżda l-virtù awtentika tissawwar mod ieħor: il-provi, id-diffikultajiet kbar u, xi drabi, it-traġedji jsiru mezz li jsaffi u jeħles lill-bniedem biex jgħix ħajja ta’ virtù. Inkella, dak li bi żball insejħulu virtù ma jkun xejn aktar minn kunċett kulturali, bi ftit li xejn fih impatt fuq id-dixxipulat Nisrani. Ħafna drabi, il-virtù falza tidher f’xi forma ta’ kburi personali u sens ta’ superjorità, bħalma jurina Ġesù fil-parabbola tal-Fariżew li kien iqis lilu nnifsu ġust (Luqa 18,9-14). Abigail Adams, mart il-President Amerikan tas-seklu tmintax John Adams, kienet tgħallem lil uliedha: “Agħmlu t-tajjeb u kunu tajbin.” Dan jiġbor fil-qosor il-Liġi Naturali universali li tinsab fil-qalb ta’ kull bniedem. Aktar tard, jekk iż-żgħażagħ ikollhom ix-xorti, jitgħallmu aktar dwar xi jfisser dan permezz tal-istorja u tat-tradizzjoni reliġjuża. Il-virtujiet kardinali li ġejjin mill-qedem — magħrufa wkoll bħala l-virtujiet pagani — huma l-qawwa, ir-rażan, l-għaqal u l-ġustizzja. Dawn huma msejsa fuq bilanċ bejn estremi opposti, bħat-Tao. Il-virtujiet kardinali jistgħu jitħaddmu minn kulħadd, Nisrani jew le, jekk wieħed jeżerċita dixxiplina u kontroll raġonevoli fuqu nnifsu. Madankollu, il-virtujiet teologali l-kbar tal-fidi, tama u imħabba, huma doni li jmorru lil hinn mill-ħila naturali tal-bniedem; ma jistgħux jinkisbu bis-saħħa tar-rieda umana biss. Il-virtujiet teologali jaslu għand id-dixxipli Nsara permezz tal-Ispirtu s-Santu; u ħafna drabi jfissru xi ħaġa differenti minn dak li naħsbu, bħal meta l-ottimiżmu jitħawwad mat-tama. L-ewwel pass biex “tagħmel it-tajjeb u tkun tajjeb” huwa li tixtieq il-virtù qaddisa u, permezz tal-indiema mid-dnub u tal-bidla fil-ħajja, titlob lil Alla jagħtik dan id-don: “Ġesù, libbisni bil-virtù tiegħek”. Isaija (61,10) ħabbar minn qabel dan id-don fil-viżjoni tiegħu tal-“ilbies tas-salvazzjoni” mogħti lill-għarus u lill-għarusa, sabiex jitlibbsu “bil-mantar tal-ġustizzja”. San Pawl imur aktar lil hinn fl-ittra tiegħu lill-Kolossin meta jħeġġeġ lill-Insara biex “iwarrbu l-għemejjel tad-dlam u jilbsu l-armi tad-dawl”; u jfisser dan billi jitkellem dwar li nilbsu “il-ħniena, it-tjieba, l-umiltà, il-ħlewwa u s-sabar”. Hawnhekk niftakru fir-rakkont magħruf dwar San Filippu Neri u l-isforz tiegħu biex jikber fil-virtù. Minħabba li kellu temperament furjuż, talab bil-ħerqa lil Ġesù biex jeħilsu mir-rabja tiegħu ħalli jkun jista’ “jkun tajjeb u jagħmel it-tajjeb”. F’qalbu ħass paċi kbira, iżda malli ħareġ mill-kappella, dik il-paċi sfaxxat quddiem żewġ konfronti wara xulxin ma’ żewġ reliġjużi sħabu, li normalment kienu ġentili u edukati. Wieħed wara l-ieħor, ipprovokaw lil Filippu bi kliem iebes u b’imġiba goffa. Mifni bil-frustrazzjoni, Filippu ġera lura lejn il-kappella u għajjat: “Mulej, ma tlabtekx teħlisni minn din ir-rabja?” Ġesù wieġbu: “Iva, Filippu. U proprju għalhekk qiegħed inkattarlek l-okkażjonijiet biex titgħallem.” Ruth D. Lasseter Assoċjata Indiana, l-Istati Uniti

Eugenio Borg għandu post uniku fl-istorja tas-Soċjetà tad-Duttrina Nisranija (M.U.S.E.U.M.), bħala l-eqreb kollaboratur ta' San Ġorġ Preca u l-ewwel Superjur Ġenerali tagħha. Twieled fl-Isla fl-24 ta' Lulju 1886 u, meta kien għadu tifel, mar joqgħod mal-familja tiegħu l-Ħamrun, fejn il-providenza bdiet tħejji t-triq li kienet se tfassal il-kumplament ta' ħajtu. Waqt li kien jaħdem bħala modellatur fit-Tarzna, Eugenio kien iqatta' l-ħin liberu tiegħu ma' grupp ta' żgħażagħ li kienu jiltaqgħu qrib il-Knisja ta' San Gejtanu, il-Ħamrun. Ħajjithom inbidlet għal kollox meta s-seminarista żagħżugħ Ġorġ Preca resaq lejhom u beda jkellimhom dwar il-Passjoni ta' Kristu. Milquta bl-umiltà u l-fidi tiegħu, il-grupp talbu jerġa' jmur jiltaqa' magħhom, u dawn il-laqgħat regolari ftit ftit bdew ibiddlulhom qalbhom. Meta lemaħ il-kapaċitajiet ta' tmexxija u l-ġenerożità kbira ta' Eugenio, Dun Ġorġ beda jifformah personalment permezz tat-talb, tal-Iskrittura Mqaddsa u ta' mixjiet twal flimkien, u hekk ħejjieh biex isir wieħed mill-pilastri ewlenin tas-Soċjetà sa mill-ewwel snin tagħha. Hekk kif is- Soċjetà bdiet tieħu l-forma tagħha, Eugenio ħaddan l-ideali għoljin tagħha b'impenn sħiħ. Minn jeddu ċaħad drawwiet li ma kinux jaqblu mal-Evanġelju, għażel ħajja ta' sempliċità u sagrifiċċju, u kkonsagra ruħu kompletament lil Alla u għall-appostolat. Fl-1907 ingħaqad mal-ewwel grupp li beda jiltaqa' fl-ewwel ċentru tal-MUSEUM fi Triq Fra Diegu, fejn il-membri kienu jirċievu l-formazzjoni spiritwali li kellha ssawwar il-kariżma Museumina. Madwar l-1910, San Ġorġ Preca ħatru l-ewwel Superjur Ġenerali tas-Soċjetà u fdalu r-responsabbiltà li jmexxi din is-soċjetà li kienet qed tikber. Taħt it-tmexxija għaqlija u umli tiegħu nfetħu oqsma ġodda barra l-Ħamrun, filwaqt li l-ispirtu missjunarju li żera' l-Fundatur wassal biex is- Soċjetà aktar tard tinfirex ukoll fl-Awstralja u fil-Kanada. Minkejja l-kritika, in-nuqqas ta' fehim u l-oppożizzjoni, Eugenio baqa' sod, konvint li s-Soċjetà kienet opra ta' Alla u li l-fedeltà, l-umiltà u l-perseveranza kienu se jagħtu frott li jibqa'. Il-qawwa tal-appostolat ta' Eugenio Borg kienet toħroġ minn ħajja interjuri profonda, imsejsa fuq it-talb, il-meditazzjoni tal-Iskrittura Mqaddsa u devozzjoni kbira lejn l-Ewkaristija. Kien jemmen bis-sħiħ li ħadd ma jista' jagħti dak li ma għandux, u għalhekk kien ifittex dejjem għaqda dejjem aktar intima ma' Kristu qabel ma jgħallmu lill-oħrajn. Id-devozzjoni tenera tiegħu lejn il-Verġni Mbierka kompliet issaħħaħ il-ħajja spiritwali tiegħu u tispira lil dawk ta' madwaru. Bħala rikonoxximent tas-servizz straordinarju tiegħu lejn il-Knisja, il-Papa Piju XII tah il-midalja Pro Ecclesia et Pontifice fl-1958, unur li laqgħu mhux għalih innifsu iżda f'isem is-Soċjetà. Wara mewtu fit-12 ta' Marzu 1967, id-devozzjoni lejn Eugenio kompliet tikber, u fl-1997 infetħet uffiċjalment il-kawża tal-beatifikazzjoni tiegħu. Illum huwa jibqa' mudell li jispira qdusija, umiltà u ħeġġa missjunarja, u jfakkar lill-Insara li l-evanġelizzazzjoni vera tibda minn qalb mogħtija għal kollox lil Alla u titwettaq permezz ta' qadi fidil lejn l-oħrajn.

Għal miljuni ta' nies madwar id-dinja, il-futbol huwa sors ta' identità, passjoni, u komunità. Għalina l-Insara, il-futbol jista' jkun ukoll opportunità biex nirriflettu fuq il-valuri li tassew jagħmluh 'il-logħba s-sabiħa''. Forsi mhux kulħadd jaf li l-futbol għandu wkoll qaddis patrun: San Luigi Scrosoppi. Dan is-saċerdot Taljan tas-seklu dsatax la kien jilgħab, u lanqas kien kowċ, iżda ra fl-isport mezz biex iż-żgħażagħ jikbru fil-karattru, fid-dixxiplina, u fil-ħidma flimkien. Luigi Scrosoppi (1804-84) li qatta' ħafna mill-ħajja tiegħu jiġġieled kontra l-antiklerikalizmu fl-Italja, ħadem mal-foqra. Twieled f'Udine, f'familja devota ħafna, u kien iben ġojjeller. Iż-żewġ aħwa l-kbar tiegħu, Carlo u Giovanni, ġew ordnati saċerdoti qablu. Fl-età ta' 25 sena, is-sena qabel ma ġie ordnat, Luigi ngħaqad ma' grupp ta' qassisin u għalliema żgħażagħ iddedikati għall-edukazzjoni ta' bniet fqar u abbandunati, kemm fil-belt ta' Udine kif ukoll il-pajsaġġ tal-madwar. Ħadmu bla heda għall-ġbir ta' fondi, u nedew organizzazzjoni li kienet tospita aktar minn 300 student f'bini li sar magħruf bħala d-Dar tal-Faqar. “Il-Providenza ta' Alla kbira”, kiteb Scrosoppi, “tipprepara l-qlub biex iwettqu xogħlu; b'hekk sar dan l-istitut”. Ġabar flimkien tim ta' nisa żgħażagħ biex jgħallmuhom il-ħjata. Disgħa minnhom ingħaqdu flimkien bħala s-Sorijiet tal-Providenza, fl-1837, u l-Kongregazzjoni rċeviet rikonoxximent uffiċjali mill-Papa Piju IX fl-1871. Fl-1846, fl-età ta' 25 sena, Scrosoppi ngħaqad mal-Kongregazzjoni tal-Oratorjani f'Udine. Fis-snin 1860 il-politika tar-Risorgimento anti-klerikali tal-gvern fir-reġjun ta' Udine wasslu biex l-Oratorju jingħalaq. Iżda s-Sorijiet tal-Provvidenza komplew bix-xogħol tagħhom. Meta xjaħ, Scrosoppi fehem li kien wasal iż-żmien li jħalli kollox f'idejn is-Sorijiet u, fl-istess ħin, żamm kuntatt magħhom bl-ittri mimlijin b'għerf spiritwali u bl-imħabba lejn Kristu, u l-fiduċja fil-providenza. Fl-2010 ġie rikonoxxut uffiċjalment bħala l-patrun tal-futbol. Din ma kinitx. għażla każwali. Grupp ta studjużi, bl-appoġġ tal-awtoritajiet ekkleżjastiċi, fittex qaddis li kien jinkorpora l-valuri awtentiċi tal-logħba: il-ħidma f'tim, ir-rispett lejn l-oħrajn, l-edukazzjoni taż-żgħażagħ, u l-ferħ li jinbet meta tagħti lilek innifsek għall-oħrajn. F'San Luigi sabu dawn il-virtujiet kollha. Fil-futbol tal-lum, naraw il-fama, l-emozzjonijiet, il-flus, u l-kważi idolatrija. Iżda l-qalba tal-isport tibqa' x'imkien ieħor: fit-tfal li jilagħbu flimkien, fil-kowċis li jedukaw, mhux biss ifittxu r-rebħa, u fil-familji li jappoġġjaw lil uliedhom. Il-Papa Franġisku fakkarna li l-futbol huwa logħba ta' tim u li ħadd ma jirbaħ waħdu. Il-Papa Ljun XIV enfasizza kif l-isport jista' jgħinna nikbru fir-relazzjonijiet tagħna ma' Alla u mal-proxxmu. Dawn huma proprju l-valuri li San Luigi Scrosoppi għex kuljum. San Luigi jfakkarna li l-akbar rebħiet mhumiex dawk li jitniżżlu fuq l-iskorbord, iżda dawk li jinbidlu fil-qalb tal-bniedem. Din hija l-ħajja li Scrosoppi jitlobna ngħixu. Tanja Cilia Ħabiba tas-Soċjetà