Nistennew…

“Ifirħu dejjem fil-Mulej; nerġa’ ngħidilkom, ifirħu…. Il-Mulej qorob.”  (Fil 4:4-5) “Ifirħu!” Minkejja ċ-​ċirkustanzi ħżiena, xejn ma kien ifixkel il-​ferħ taʼ San Pawl! Waqt li jikteb meta kien fid-dlam tal-ħabs, hu jħeġġeġ għal darbtejn lill-Filippin: “Nerġgħu ngħidilkom, ifirħu! Tabilħaqq, il-Mulej huwa qrib.” Għalkemm magħluq f’ċella, xejn ma seta’ jwaqqaf id-dawl ta’ Ġesù, Kristu l-imbierek, li l-miġja tiegħu se ġġib fix-xejn id-dalma tal-qalb u tal-moħħ. Il-messaġġ ta’ San Pawl ikompli jidwi matul iż-żminijiet biex jingħaqad anki mal-ġenerazzjoni tagħna fit-Te Deum dwar avveniment riċenti: il-ftuħ mill-ġdid tal-Katidral ta’ Notre-Dame f’Pariġi lejliet il-festa tal-Immakulata Kunċizzjoni. Permezz tal-internet, f’ħin reali, id-dinja kollha rat il-belt ta’ Pariġi maħkuma b’riħ qawwi tul il-lejl, li ħakem l-Arċisqof ta’ Pariġi hekk kif għolla l-bastun tiegħu biex iħabbat tliet darbiet fuq il-bieb majestuż tal-Katidral ta’ Notre Dame. Minn ġewwa, ippakkjat b’dinjitarji minn ħafna pajjiżi, instema’ l-mużika tal-orgni u l-kant tal-koristi żgħażagħ lebsin libsa ta’ lewn blu. Il-bibien il-kbar infetħu, u d-dinja kollha ferħan u saħansitra tibki bil-ferħ, għax rat li t-traġedja tal-qerda bin-nar u bid-dnub, kienet ġiet restawrata fil-ġmiel tal-qdusija tal-Katidral ta’ Notre Dame. Ir-rettur tal-katidral afferma kemm hi mbierka l-għaqda fost il-popli kollha f’din il-ġrajja unika: “Fil-katidral insibu l-preżenza dejjem ġdida tal-Verġni Marija, preżenza materna u li tħaddana flimkien.’’ Fil-ftuħ tal-Katidral ta’ Notre Dame (u simbolikament bit-tama għat-tiġdid tal-fidi fi Franza), donnu nisimgħu l-cri de coeur (xewqa tal-qalb) ta’ San Ġorġ Preca: “Imgħallem Divin, mhux li kien li d-dinja kollha timxi fuq l-Evanġelju!”.  Il-ferħ tad-dinja kollha, ta’ kull persuna li kien hawn u li għad ikun hawn, huwa Ġesù li jiġi għandna permezz ta’ dik li hi l-kawża tal-ferħ tagħna: il-Madonna, Marija, Omm Alla. Ifirħu! Nerġa’ ngħidilkom, ifirħu!

Mela darba, kien hemm ġuvni li kien miexi fid-deżert ma’ Ġesù. Lil Ġesù ma kienx jarah imma kien induna bil-preżenza tiegħu minħabba li fir-ramel kien jara żewġ pari ta’ passi, tiegħu stess u ta’ Ġesù. Darba minnhom f’ġurnata qalila b’xemx tiżreġ, wara li kien ilu miexi ħafna, beda jaqta’ qalbu jekk ikomplix il-vjaġġ jew le. Malli waqaf, induna li l-passi ta’ Ġesù ma kinux għadhom hemm ħdejh. U l-ġuvni b’ċertu rabja qal: “Għala Ġesù? Tlaqtni fl-iktar mumenti diffiċli, meta l-iktar li għandi bżonnok maġenbi.” Imma Ġesù mhux talli ma kienx hemm ħdejh fil-mumenti t-tqal, talli kien Hu li kien qed jerfgħu. Tajjeb li wieħed itenni f’qalbu is-sentenza: Is-Sinjur Ġesu Kristu magħna. Din verament tfakkarna fil-preżenza ta’ Alla f’ħajjitna, għax Alla kien magħna, għadu magħna u jibqa’ magħna sal-aħħar taż-żmien. Li wieħed jagħraf il-preżenza ta’ Alla f’ħajtu mhix ħaġa faċli u wieħed jeħtieġ li jaħdem fuqha bħala parti mill-mixja spiritwali tiegħu. Nissuġerixxi, eżerċizzju ħafif li jista’ jkompli jgħinna nagħrfu li Alla hu preżenti f’ħajjitna. Dan l-eżerċizzju huwa bbażat fuq żewġ mistoqsijiet: Fejn iltqajt ma’ Ġesù llum? Fejn tlift lil Ġesù llum? Staqsi dawn il-mistoqsijiet kull jum u tkun sorpriż kemm aktar tagħraf il-preżenza ta’ Alla miegħek. Jista’ jgħinek li żżomm nota u tikteb dawk il-mumenti li tkun rajt fihom l-id ta’ Alla f’ħajtek. Meta tkun f’mumenti li tibda taqta’ qalbek, titqawwa billi terġa’ tiftakar fil-mumenti li ħassejtek fil-preżenza t’Alla. Jalla dawn il-jiem tal-Avvent ikunu jiem fejn aħna nikbru aktar fl-għaqda tagħna ma’ Alla u narawh aktar jaħdem fina u bina. Hayden Diacono Kandidat

Li kieku tkun taf li ġej ħalliel biex jidħollok ġo darek, ma tagħmilx minn kollox biex tħejji ruħek ħalli ma tħallihx jinfidlek il-ħitan ta’ darek? (Mt. 24:42) Bla dubju! San Ġorġ Preca kien spiss itenni li d-dnub huwa l-akbar għadu tal-bniedem, speċjalment għax jaqtgħu mill-akbar benefettur tiegħu li hu Alla. Il-kruha u l-ħsara li jġib id-dnub fuq il-bniedem tidher b’mod qawwi fil-fatt li l-Iben t’Alla sar bniedem u offra li jgħaddi minn passjoni u mewt krudila biex isalvana mill-ħakma tad-dnub. Tajjeb li wieħed jaħseb fuq il-konsegwenzi tad-dnub biex jikkonvinċi aktar ruħu fuq kemm għandu jevitah mill-ħajja tiegħu u jiftakar kemm ġid joħroġ mill-grazzja t’Alla. Inħarsu lejn Marija u niftakru fil-konċepiment immakulat tagħha. Nitolbuha biex bħalha nżommu lilna nfusna ‘l bogħod mid-dnub, l-akbar għadu tagħna l-bnedmin, u fuq l-eżempju tagħha nitolbu lil Alla jimliena bil-grazzja tiegħu! Tkun imbierka Marija Santissma. Imbierek il-Konċepiment Immakulat tagħha. Imbierka l-Maternità tagħha. Imbierka l-Assunzjoni tagħha fis-sema. Imbierka l-Verġnità tagħha. Imbierka l-umiltà tagħha. Imbierka l-karità ta’ qalbha.

Qima lil Marija Santissma Bil-grazzja mimlija, Omm u dejjem Xebba, Ħelwa Ommna Marija: Itlob ’l Alla għalina. Kull kreatura, o Marija tinkina quddiemek, għax tassew ħwejjeġ kbar għamel miegħek Dak li jista’ kollox. Alla l-Missier tak is-smewwiet, u l-art; Alla l-Iben tak l-ubbidjenza fis-sottomissjoni; Alla l-Ispirtu s-Santu tak kemm tista’ tkun eżaltata kreatura minn Alla fl- ogħla grad.   Ringrazzjament fuq Marija Santissma Alla Missier, jiena noffrilek il-pjagi divini ta’ Kristu Ibnek, biex nirringrazzjak denjament għal kull m’inti għamilt ma’ Marija Santissma, speċjalment fil-Kunċizzjoni Immakulata tagħha u fl-eżaltazzjoni li inti kollok omnipotenza u tjubija tajtha għall-unur tiegħek. Ammen.

L-Avvent, li huwa żmien importanti fis-sena liturġika, huwa dwar l-esperjenza umana ta’ stennija. Dan iż-żmien tas-sena mhuwiex dwar ċelebrazzjonijiet ta' festi u ritwali. Minflok, il-qawwa ta’ dan iż-żmien jinsab fil-mod kif imiss il-qalbna u kif iġibna konxju tal-emozzjonijiet l-aktar profondi tagħna. Filwaqt li nkunu qed naħsbu fuq il-​ħajja taʼ Ġesù, aħna nitgħallmu aktar dwar ħajjitna stess u dwar l-​emozzjonijiet u l-​ġlidiet li nesperjenzaw. L-avvent huwa vjaġġ spiritwali li jgħinna nifhmu lilna nfusna aħjar u nsibu s-saħħa biex nibqgħu mexjin wara s-Sinjur Ġesù. B’mod partikolari, l-Avvent jgħallimna nistennew u naraw lil hinn minn dak li hu ovvju. Huwa żmien li jistedinna nsibu lil Alla fil-mumenti żgħar ta’ kuljum tal-ħajja. Kull jum niskopru xi ħaġa ġdida li żżid mal-istampa l-kbira tal-vjaġġ tal-fidi tagħna. L-istennija tgħallimna l-paċenzja u tgħinna nikbru spiritwalment. Billi niffokaw fuq il-preżent u nagħrfu l-ħidma t’Alla f’ħajjitna, insiru aktar maturi fil-fidi tagħna u ppreparati aħjar għal dak li għad irid jiġi. Dan il-perjodu liturġiku jħeġġiġna wkoll biex nikklamaw u nirriflettu f’dinja mgħaġġla li fiha xi kultant inħossuna eżawriti. Huwa żmien li jipprovdilna pawża mir-rutini mgħaġġla biex jagħtina opportunità naħsbu dwar x’inhu dak li huwa verament importanti. Bil-qari tal-​Iskrittura, aħna nirriflettu fuq l-​aspetti spiritwali tal-​ħajja li ħafna drabi ninjoraw fil-ħajja tagħna taʼ kuljum. Dan iż-żmien liturġiku jgħinna nixxenqu għal dak li hu spiritwali u għall-affarijiet li jmorru lil hinn minn dak li huwa ta’ issa. L-Avvent iħeġġiġna biex inkunu aktar konxji u napprezzaw il-preżent, filwaqt li nħejju qlubna għall-miġja tas-saltna t’Alla li għad trid tiġi. Ieqaf u staqsi lilek innifsek: Tassew li naf lil Alla meta m’għandi l-ebda xewqa li mmut biex inkun miegħu? Li kieku kelli mmut għal ftit u ħaj mill-ġdid niġi lura, kieku nkompli ngħix kif qiegħed ngħix? Jiddispjaċini tassew minn dnubieti jekk ma rridx naħrab serjament l-okkażjoni li twassalni għad-dnub?

Fi ħdan it-taħlita mżewqa ta’ kulturi Kenjani u r-ritmu mgħaġġel tal-ħajja moderna, qed tinbet u tikber ġenerazzjoni ġdida ta’ adolexxenti Kattoliċi – ġenerazzjoni determinata li twaħħad il-fidi Kattolika mar-realtajiet tal-lum. Kif is-soċjetà ssir iktar sekulari, l-iktar minħabba l-influwenza kbira tal-media soċjali, hija din il-faxxa ta’ etajiet li l-iktar iħossu din il-bidla. Affaċċjat minn pressjonijiet biex jikkonforma man-normi tradizzjonali, li tkun adolexxent li qed tipprova tgħix il-fidi Kattolika, ħafna drabi tinħass battalja għat-telgħa. Il-fidi sikwit tintlaqa’ b’xettiċiżmu u xi kultant tiġi rredikolata, skartata bħala xi ħaġa skaduta f’dinja li tgħożż il-modernità. Hu ferm faċli li tħossok iżolat meta tagħżel il-quddiesa minflok xalar f’xi party jew li tgħallem il-katekiżmu minflok xi lejl divertiment. Din l-isfida tistedinna mhux biss biex niddefinixxu xi tfisser tgħix ta’ Nisrani imma li nixorbu wkoll mill-istess għajn li nipprietkaw minnha. Bħal xabbaturi li jiddependu fuq xulxin biex jilħqu l-quċċata ta’ muntanja, aħna l-Kattoliċi żgħażagħ ukoll neħtieġu l-appoġġ ta’ xulxin. Il-fidi tissaħħaħ u tagħti l-frott fl-għaqda, fi ħdan gruppi taż-żgħażagħ fil-Knisja, laqgħat oħra jew fil-qasam tal-MUSEUM. Fihom insibu kenn, post fejn naqsmu t-taqbid li nkunu għaddejjin minnu, nikbru fil-fidi u nappoġġjaw lil xulxin f’dan il-vjaġġ. Hawnhekk insibu persuni li jiddiriġuna, ħbieb li jiggwidawna, jgħinuna nterrqu fil-mogħdijiet xi kultant imħarbta tal-għixien tal-fidi tagħna. F’dinja li tiġbidna lejn ħafna direzzjonijiet, il-fidi tħawwilna f’ dak li hu etern. Permezz ta’ dan il-vjaġġ, aħna nikbru mhux biss fir-relazzjoni personali ma’ Alla imma wkoll fl-impenn għall-komunità tagħna - nagħtu forma tanġibbli lill-fidi f’dinja li tant sikwit tiddubitaha. Thomas Njugun Kandidat mill-Qasam ta’ Ruiru, il-Kenja