Temmnu inti dan?

L-irmied tal-2024 diġà qed jiksaħ. Madankollu, f’din is-sena tal-Ġublew tat-Tama, għad hemm raġġ jiddi mill-passat. Terġa’ tiġi fina xewqa għar-riżoluzzjonijiet tajbin u l-fervur jerġa' jibda, iżda dan iseħħ biss jekk id-drawwiet qodma tal-għażż u l-egoiżmu jitħallew warajna. Hija biss il-virtù li tista’ twassalna biex inwettqu r-riżoluzzjonijiet tajbin għas-sena l-ġdida. Minn fejn se tiġina l-qawwa biex nerġgħu nibdew mill-ġdid, biex insostnu l-ħajja tal-virtù? Aħna persważi li Alla biss jistaʼ jġib it-tiġdid awtentiku, huwa Alla waħdu li jista’ jqanqal fina il-fjamam tal-Fidi u jġedded id- determinazzjoni fil-mixja tagħna wara Ġesù. San Ġorġ Preca ifakkarna kemm l-attitudni ta’ radd il-ħajr flimkien ma’ dik ta’ maħfra għandha akkumpanjata tul ħajjitna: “Grazzi, Sinjur Alla u  aħfirli, Sinjur Alla”. Bi gratitudni u b’umiltà, nduru lejn Alla fit-talb tagħna u nitolbu, permezz tal-Pjagi Divini, li jagħtina dak li hu meħtieġ biex nerġgħu nibdew mill-ġdid u nġeddu l-komunitajiet tagħna fil-fidi. L-intenzjonijiet u x-xewqat tajbin tagħna jissaħħu bil-virtù tal-kuraġġ, li hija virtù tal-qalb. Huwa fil-Qalb Imqaddsa ta’ Ġesù li nsibu l-qawwa biex inkomplu bir-ritmu tal-ħajja qaddisa tagħna fit-talb, fil-ħidma u fil-vokazzjoni tagħna. Fl-2025, nistgħu nsibu l-qawwa u l-kuraġġ f’qalbna stess billi nirċievu l-Imħabba ta’ Ġesù? Ruth D. Lasserter Ħabiba tas-Soċjetà Indiana, l-Istati Uniti

Kull persuna b’xi mod jew ieħor għandha bżonn il-virtù tat-tama. Fil-ħajja ta’ kuljum inpoġġu t-tama tagħna regolarment fin-nies u fl-affarijiet, bħal f’piloti li jtajru ajruplan b’mod sigur u f’kokijiet li jsajru l-ikel b’mod iġjeniku. Imma għalina l-Insara, it-tama tmur lil hinn minn kapaċitajiet tal-persuna. Għalhekk, aħna, l-Insara fidili, irridu nittamaw fil-Mulej kif jgħid il-profeta Mikea. Din it-tama għaliex neħtiġuha? Il-ktieb ta’ Iżaija jiddeskrivieha b’mod sabiħ ħafna fejn insibu li dawk li “jittamaw fil-Mulej jieħdu saħħithom, itellgħu l-ġwienaħ bħall-ajkli, jiġru bla ma jegħjew, jimxu bla ma jintelqu” (Iż 40:31). Permezz tat-tama aħna jkollna skop biex ngħixu l-fidi tagħna. Ma kienx hemm qaddis li ma kellux it-tama fil-glorja t’Alla. L-iktar persuna fil-Bibbja li jsemmi din il-virtù teologali hu San Pawl, li t-tama jaraha bħala ingredjent essenzjali biex il-ħrara tagħna ma tibridx. Iżid li għandna nifirħu bit-tama u dan tassew minnu għax nafu li nistgħu nduqu l-ħwejjeġ tas-sema jekk ikollna lilha. Ma rridux neskludu l-importanza tat-tama għall-Papa Franġisku li addotta din t-tema għall-Ġublew. Il-Papa jsemmi l-Bolla tal-Indizzjoni: Spes Non Confundit, li tfisser, ‘it-tama ma tqarraqx’, kliem l-Appostlu San Pawl. Il-Papa jsejħilna biex inkunu “Sinjali tanġibbli ta’ tama għal tant ħutna li qed jgħixu f’kundizzjonijiet ibsin” (10). Ikompli jżid il-Papa li din “it-tama ma ċċedix fid-diffikultajiet: hi tinbena fuq il-fidi u titmantna bl-imħabba” (3). Għalhekk f’din is-sena tal-Ġublew tat-Tama nippruvaw ngħarblu lil ruħna u nistaqsu: Aħna nittamaw fil-bnedmin jew f’Alla? Qed inkunu xhieda tat-tama fil-Mulej? Jake Bezzina Kandidat

Għandi wkoll nagħaġ oħra, li mhumiex minn dan il-maqjel; lilhom ukoll jeħtieġ li niġbor, u huma jisimgħu leħni, u jkun hemm merħla waħda, ragħaj wieħed. (Ġw 10:16) Mit-18 sal-25 ta’ Jannar, issir ġimgħa ta’ talb għall-għaqda tal-knejjes insara. Ħafna snin ilu dawk li jemmnu f’Ġesù kienu Knisja waħda, bil-Papa bħala kap tagħhom, Imma imbagħad xi knejjes infirdu u ma baqgħux mal-nisja Kattolika. Hija x-xewqa ta’ Ġesù stess li l-insara kollha komunità waħda. Fl-aħħar ċena, huwa talab biex ikun hemm “merħla waħda taħt ragħaj wieħed”. Għalhekk din il-ġimgħa tissejjaħ ‘Ġimgħa Ekumenika’ li bil-Grieg tfisser, id-dinja kollha fejn jgħixu n-nies. Ġimgħa li fiha niftakru fl-importanza tal-ħidma għall-għaqda bejn l-insara Kattoliċi, Ortodossi u Protestanti. Dawn kollha jemmnu f’Alla l-Missier, f’Ġesù l-Iben t’Alla u fl-Ispirtu s-Santu. Għandna nirreferu għall-insara kollha, bħala ħutna fil-Mulej, għax apparti li kollha nqismu lil Ġesù bħala ħuna, hemm ħafna elementi li jġibuna flimkien. L-istqarrija ta’ fidi waħda, iċ-ċelebrazzjoni tas-sagramenti, is-suċċessjoni appostolika, u fuq kollox l-imħabba, għandhom iresquna lejn xulxin bħala familja waħda. Ejjew nitolbu bit-talba ta’ San Ġorġ Preca: Sinjur Alla Missier, ħares lejn il-vinja li ħawwel b’demmu Ibnek l-għaziż, u saqqiha bin-nida tal-grazzja tiegħek b’mod li toktor fin-numru tal-fidili, u fl-għożża tat-tagħlim, u fil-vera paċi u fl-imħabba. U sabiex żgur naqilgħu minnek din il-ħniena, noffrulek il-pjagita’ Ibnek Kristu Ġesù, li immerita għall-bnedmin kollha l-grazzja tiegħek. Ammen.

André Bessette, imwieled Alfred Bessette, twieled fid-9 t’Awwissu tal-1845, f’Quebec, il-Kanada, u kien it-tmien wild fost tnax. Meta kellu biss tnax-il sena, mitulu l-ġenituri u kellu jmur jaħdem għal rasu fl-Amerika. Ta’ 25 sena, irritorna lura Quebec u l-kappillan ħajru għall-ħajja reliġjuża u bagħtu għand il-patrijiet tal-Kongregazzjoni tas-Salib Imqaddes. Però, wara sena novizzjat ma ġiex aċċettat minħabba saħħtu li kienet dgħajfa sa minn tfulitu. Wara li rrikkmandah l-Isqof Bourget, il-Kongregazzjoni laqgħetu u André baqa’ magħhom sal-aħħar ta’ ħajtu. Is-superjuri baqgħu xettiċi fuqu. Tawh irwoli żgħar bħal li jieħu ħsieb il-bieb tal-Kulleġġ ta’ Notre Dame f’Montreal, jaħsel il-ħwejjeġ u jagħmilha ta' sagristan u messaġġier, però xejn ma skuraġġieh milli jkompli. Infatti kien qal: ”Meta ngħaqadt ma’ din il-komunità, is-superjuri bagħtuni mal-bieb u jien bqajt għal erbgħin sena”. San André kellu devozzjoni kbira lejn San Ġużepp u din wasslitu biex jitlob lill-isqof għall-fondi biex jibni kappella ddedikata lilu fuq il-Muntanja Royal. Tah il-permess imma rrifjuta li jtih fondi u għalhekk André bena kappella minn xi flus li kien ġemma’ maż-żmien. Bessette baqa’ jiżviluppa l-kappella u żied magħha post fejn joqogħdu l-patrijiet biex jieħdu ħsieb is-santwarju. Sal-aħħar ta’ ħajtu il-kappella saret bażilika li sal-lum għadha l-akbar knisja fil-Kanada u għandha waħda mill-ikbar koppli fid-dinja. San André miet fis-6 ta’ Jannar tal-1937 meta kellu 91 sena. Ġie kkanonizzat fis-17 t’ Ottubru 2010 u huwa l-ewwel qaddis tal-Kongregazzjoni. Avolja ħafna kkritikawh u ma emmnux fih, ħadd ma rnexxielu jwaqqaf ’il San André u dan iservi ta’ eżempju għalina biex qatt ma naqtgħu qalbna u nagħmlu dejjem ir-rieda t’Alla għalina. Daniel Cardona Kandidat

Il-festa tal-Magħmudija ta’ Ġesù tistedinna nirriflettu fuq il-Magħmudija tagħna stess. B’qalb umli, Ġesù jingħaqad man-nies ta’ żmienu biex jirċievi l-Magħmudija mingħand Ġwanni l-Battista. Din timmarka t-tielet Epifanija, fejn Alla juri lilu nnifsu permezz ta’ Ġesù. Leħen il-Missier jiddikjara, “Int Ibni l-maħbub; fik insib l-għaxqa tiegħi!”. Huwa tassew ta’ ispirazzjoni li naraw lil Ġesù, li huwa Alla, li jsib l-għaxqa tiegħu filli jkun qrib il-poplu tiegħu. Permezz ta’ Ġesù, Alla l-Missier jistedinna nidħlu f’relazzjoni intima miegħu. Huwa okkażjoni tajba illi illum nirriflettu fuq ir-relazzjoni tagħna ma’ Alla. Tħoss l-imħabba tiegħu f’ħajtek? Kapaċi tara wiċċu f’wiċċ ħaddieħor? Għandek qalbek miftuħa biex tisma’ il-leħnu f’qalbek? Mod qawwi biex niftakru fuq ir-rabta tagħna ma’ Alla huwa billi niftakru fid-data tal-Magħmudija tagħna, il-jum li fih twelidna fl-Ispirtu u fil-Knisja Kattolika. Il-Papa Franġisku jħeġġiġna niċċelebraw dan il-jum tant importanti għan-nisrani, meta sirna wlied Alla. Il-Magħmudija ta’ Ġesù tfakkarna li Alla mhux ’l bogħod minna imma miexi magħna fil-mixja tagħna lejn il-Missier.

The Genesee Diary: Report from a Trappist Monastery ta’ Henri Nouwen huwa djarju personali tas-seba’ xhur li hu qatta’ f’monasteru tat-Trappist fi New York. Bħala qassis Kattoliku u għalliem, Nouwen jieħu pawsa mill-ħajja impenjattiva tiegħu biex jikkonċentra fuq it-talb u l-ħajja interjuri. Fid-djarju tiegħu, huwa jaqsam b’mod miftuħ l-isfidi li sab, bħad-dubji, il-biżgħat, u x-xewqa li jersaq eqreb lejn Alla. Ir-rutina ta’ kuljum tal-monasteru, mibnija fuq it-talb, ix-xogħol, u s-silenzju, issir kemm sfida kif ukoll sors ta’ maturazzjoni, hekk kif jitgħallem jikkalma u jisimgħu lilu nnifsu. Permezz tar-riflessjonijiet tiegħu, il-qarrejja jistgħu josservaw il-kumbattimenti ta’ Nouwen ma’ mistoqsijiet dwar l-identità, l-iskop tal-ħajja, u l-fidi. L-esperjenzi tiegħu jistednuna nirriflettu fuq ħajjitna u nirrikonoxxu l-valur li naħarbu mid-distrazzjonijiet biex niffukaw fuq dak li hu tassew importanti. Dan il-ktieb huwa meqjus bħala wieħed li jispira għax Nouwen jirrifletti fuq ħsibijiet spiritwali b’mod mill-aktar awtentiku. Huwa jagħti stampa dettaljata tal-ħajja sempliċi tal-monasteru u jesponi kemm il-paċi kif ukoll l-isfidi tagħha. Bil-kitba tiegħu Nouwen imiss emozzjonijiet universali, bħas-solitudni, il-ħtieġa tar-relazzjonijiet, u x-xewqa għall-paċi interna. Fl-aħħar tal-vjaġġ tiegħu, Nouwen isib sens ġdid ta’ fiduċja f’Alla u għarfien aktar profond tal-umiltà u l-grazzja. The Genesee Diary mhux biss huwa djarju spiritwali iżda għandu jservi ta’ stedina biex aħna wkoll infittxu l-paċi u nippruvaw nifhmu aħjar is-sens tal-ħajja tagħna.

Fl-Epifanija niċċelebraw kif Ġesù wera lilu nnifsu lill-umanità, ġrajja li tfakkarna fiż-żjara tas-Slaten Maġi. Iżda niftakru wkoll li Ġesù jkompli juri lilu nnifsu lilna fil-magħmudija tiegħu, fuq il-muntanja Tabor, waqt il-mirakli tiegħu, fuq il-Golgota u b’mod mill-aktar qawwi fil-qawmien tiegħu mill-imwiet. Kif jgħid San Ġwanni: "u aħna rajna l-glorja tiegħu" (Ġw 1:14). Din il-glorja ddawwal lil dawk kollha li jiftħu qalbhom għalih biex iwarrbu d-dlam tad-dnub minn qalbhom. Ġesù jistedinna biex, bħas-slaten, nagħrfuh bħala s-sultan tagħna, nadurawh bil-qalb bħala Alla tagħna u noffrulu b’mod totali r-rieda tagħna. Filwaqt li nkomplu bil-vjaġġ tal-ħajja tagħna, nitolbu l-grazzja li nagħrfuh dejjem aktar, għax għal dan biss aħna ġejna maħluqin: li nkunu f’relazzjoni ħajja u sabiħa miegħu. Santu Wistin jgħallimna li t-tfittxija għall-maħbub tagħna Ġesù hija l-isbaħ avventura tal-ħajja u li jirnexxielna nagħrfuh hija l-akbar skoperta. Sinjur Alla, din hi l-ħajja ta’ dejjem, li aħna l-bnedmin nagħrfu lilek, Alla waħdek veru u lil Ġesù Kristu li Inti bgħatt: iftħilna s-sens nitolbuk, biex bil-grazzja tiegħek, nagħrfu fl-art lilek u lil Ġesù Kristu nnifsu, u hekk ikollna l-ħajja ta’ dejjem. Ammen. (Praeconia, San Ġorġ Preca)