Il-Bidu
Imwieled il-Belt Valletta nhar it-12 ta’ Frar 1880, Ġorġ kien is-seba’ wild minn disgħa ta’ familja ta’ klassi medja. Missieru, Vinċenz Preca, kien għall-ewwel merkant u iktar tard spettur tas-sanità. Ommu, Natalina Ceravolo, kienet għalliema. Tfulitu ma kinitx xi żmien spettakolari, għalkemm ma naqasx fih is-sens ta’ avventura u kuraġġ, li jiffurmaw is-sinsla ta’ kwalunkwe mexxej. Meta ħass li kien imsejjaħ biex ikun saċerdot, mil-Liċeo daħal is-Seminarju, fejn bħala student iddistingwa ruħu fl-istudji tiegħu, speċjalment fil-Latin.
Kien ġuvni li ma kienx jattira l-attenzjoni ta’ dak li jkun, iżda minkejja dan, Alla kien diġà ħejja l-pjan tiegħu għalih, biex dak li ma kienx mistenni, beda jseħħ. Tliet persuni b’fama ta’ qdusija, il-Franġiskan Fra Diegu Bonanno, Dun Erkole Mompalao u Dun Alwiġ Galea (id-direttur spiritwali tiegħu), donnhom kienu ispirati minn Alla u bdew jaraw minn qabel dak li kien se jiġri fil-futur qarib. Il-kliem ta’ Dun Ercole Mompalao, speċjalment, kellu jseħħ b’mod tal-għaġeb:
“Preca, inti għad tikber, issir qassis u nies li jirrispettaw ‘l Alla jidħlu fil-ħbiberija tiegħek u int fil-ħbiberija tagħhom. Int issib xortik permezz tagħhom u huma jsibu xortihom permezz tiegħek”.
Li kieku missier Ġorġ u t-tabib kienu jafu dwar din il-profezija, kieku żgur kienu jgħidu li kienet falza għaliex Ġorġ kien żagħżugħ marradi. Kien jeżisti dubju serju f’moħħ it-tabib Meli jekk kienx se jkun ħaj biex jiċċelebra l-ewwel quddiesa tiegħu f’Diċembru tal-1906, minħabba li kien diġà nixiflu pulmun wieħed.
Manuvra b’Sigarett
Iżda San Ġorġ Preca ma mietx. Baqa’ ħaj wara li kienu ilhom li mietu kemm missieru u kemm it-tabib Meli. Anzi, laħaq għalaq 82 sena qabel miet. Il-ferħ tagħna mhuwiex biss li għex ħajja twila, iżda li ż-żmien li kellu użah tajjeb ħafna.
Meta kien seminarista, kien imur sal-Port il-Kbir, jitla’ fuq vapuri barranin li kien ikun hemm, u jintroduċi lilu nnifsu lill-baħrin Griegi, Ingliżi u Franċiżi billi joffrilhom sigarett. Kemm l-intelliġenza akuta kif ukoll l-umoriżmu tiegħu kienu jiġbdu l-attenzjoni ta’ dawk l-irġiel li kien ikunu ilhom żmien twil fuq il-baħar, u f’ħin qasir il-kjeriku żagħżugħ kien iwassal ‘il-udjenza tiegħu għal ħwejjeġ spiritwali. Ħafna kienu dawk il-baħrin li baqgħu impressjonati minn dan ir-raġel ġentili li kien ifittex b’ħerqa kbira l-ġid tal-proxxmu tiegħu.
Din il-manuvra b’sigarett kienet użata ta’ spiss. Meta sar jaf li grupp ta’ żgħażagħ kellhom id-drawwa li jiltaqgħu regolarment, San Ġorġ Preca malajr ra kif ikollu ħbiberija magħhom. Mhux dejjem kien milqugħ b’edukazzjoni minnhom, iżda iktar iva milli le, kien jintlaqa’ sew, tant li l-kliem tiegħu fuq ħwejjeġ spiritwali kien ikun milqugħ u aċċettat daqs kliemu fuq affarijiet oħra. Ftit wara, dan il-grupp ta’ żgħażagħ, li kien jiltaqa’ viċin il-knisja parrokkjali tal-Ħamrun, l-ewwel fosthom ikun Ewġenju Borg, beda jikber u jiżdied, tant li kellha tinkera kamra biex setgħu jiltaqgħu fiha.
