Fil-ġimgħa ta’ bejn it-Tnejn 15 u l-Ġimgħa 19 ta’ Settembru, is-Soċjetà tad-Duttrina Nisranija MUSEUM se tkun qed torganizza l-attività Watch Reflect Act, attività miftuħa għall-pubbliku fiċ-ċentru tal-Konferenzi Dar il-Ħanin Samaritan, Santa Venera.

It-tema ta’ din l-attività se tkun l-edukazzjoni: X’inhu l-effett li qed tħalli fuq il-ġenerazzjonijiet il-ġodda? X’jiġri meta edukatur jitlef triqtu u kif jista’ jkun li l-edukatur ikun sinjal ta’ tama?

Matul din il-ġimgħa, kuljum se jintwera film fuq it-tema tal-edukazzjoni u wara jkun hemm ħin fejn min jixtieq jingħaqad magħna fil-ġnien għal diskussjoni informali fuq it-temi tal-film.

Il-ħames films magħżula huma:

• The Teacher Who Promised the Sea (El maestro que prometió el mar) – film Spanjol li ħareġ fl-2023, dirett minn Patricia Font. Il-film huwa bbażat fuq l-istorja vera ta’ Antoni Benaiges fiż-żmien ta’ qabel ir-rivoluzzjoni Spanjola u huwa ispirat mill-ktieb bl-istess isem ta’ Francesc Escribano.
• The Teachers’ Lounge (Das Lehrerzimmer) – film Ġermaniż li ħareġ fl-2023 dirett minn İlker Çatak u li jittratta inċident ta’ serq fi skola li jwassal għal serje ta’ problemi oħra.
• Club Zero – film li ħareġ fl-2023 dirett minn Jessica Hausner dwar għalliema maħkuma mill-ideoloġiji ta’ żmienna.
• Radical – comedy-drama Messikan li ħareġ fl-2023, ibbażat fuq storja vera ta’ Sergio Juarèz Correa. Il-film hu dirett minn Christopher Zalla.
• Tinā – huwa film drama minn New Zealand li ħareġ fl-2024 dirett minn Miki Magasiva. L-istorja tagħtina ħarsa lejn id-diffikultajiet ta’ għalliema tal-mużika wara terremot qawwi li miss ħafna ħajjiet, fosthom tagħha.

L-attività tibda fis-7:30pm u hija miftuħa għal kull min jinteressah il-qasam tal-edukazzjoni u l-ġid tal-ġenerazzjonijiet il-ġodda u ta’ pajjiżna.

Direzzjoni – Ċentru tal-Konferenzi Dar il-Ħanin Samaritan, Santa Venera