“Jiena d-dawl tad-dinja. Min jiġi warajja ma jimxix fid-dlam, iżda jkollu d-dawl tal-ħajja.”
Ġw 8,12
Il-mibki Papa Benedittu XVI kiteb il-ktieb Ġesù ta’ Nazaret: Ġrajjiet ta’ Tfulitu li ġie ppubblikat għall-ewwel darba fl-2012. F’dan il-ktieb, il-Qdusija Tiegħu jirrifletti fuq ir-rigali tal-maġi u l-istilla li mxew warajha. Huwa jissuġġerixxi li filwaqt li kien hemm ħafna studji dwar il-possibbiltajiet astroloġiċi tal-istilla ta’ Betlem, is-sinifikat aktar profond għall-insara jinsab fil-perspettiva spiritwali. L-istilla hija sinjal tax-xenqa li kull bniedem għandu għal Alla, il-kreatur ta’ kollox u tal-persuni kollha. Għalhekk, l-istilla hija dawl sopranaturali, li joħroġ mit-Trinità Qaddisa, li jiġbed lin-nies kollha. Jammettux jew le, l-istilla hija mdawwla b’dawl divin tas-sema, li tidher għall-ewwel darba f’Betlem, u tiġbed kemm l-għorrief kif ukoll ir-rgħajja fqar u umli. Barra minn hekk, il-Knisja medjevali rat l-istilla bħala d-dawl li jiggwida t-tliet fażijiet tal-ħajja umana: iż-żgħożija, il-ħajja adulta, u x-xjuħija. Fil-personaġġi tal-maġi, jew it-tliet slaten tal-orjent, kull fażi tal-ħajja għandha don uniku biex iġġib ir-ringrazzjament lejn Ġesù Tarbija, il-Kelma Inkarnata ta’ Alla.
Id-deheb jirrappreżenta l-awtorità ta’ Ġesù fuq il-ħolqien kollu. Id-deheb huwa simbolu tal-aqwa affarijiet fil-ħajja, dawk l-affarijiet li ma jitħassrux u lanqas jintilfu. Id-deheb huwa assoċjat mar-realtà prezzjuża tal-għerf, li tinsab fil-verità tal-preżenza ta’ Alla fostna u fl-esperjenza tal-imħabba vera. L-għerf huwa meqjus bħala don rari ta’ fehim għaliex ħafna drabi jitwarrab bil-bluha taż-żgħożija għax-xenqa għall-flus, is-sess u l-fama.
L-inċens huwa simbolu tad-don ta’ ħajja spiritwali matura, li ġeneralment tintlaħaq fl-età adulta. L-inċens jiġi offrut bħala riżultat tal-ispirtu u l-ħajja tal-bniedem mimlija bin-nar għal Alla. L-inċens huwa r-rigal li jiġi mill-għażla li wieħed jirbaħ ix-xewqa għall-affarijiet mundani, u minflok jimtela bil-gratitudni għad-doni tal-għerf u r-relazzjonijiet mimlijin bl-imħabba. Ir-rispons xieraq tal-ħajja adulta, ir-rigal tal-inċens, huwa dak ta’ radd il-ħajr, ta’ talb li jitqies bħala essenzjali għall-ħajja umana, bl-għarfien li Ġesù huwa l-awtur tal-ħajja, tal-grazzja, u l-Qassis il-Kbir. L-għotja tal-inċens timxi mal-attitudni ta’ gratitudni u s-sottomissjoni tal-isforzi u r-relazzjonijiet kollha lejn l-akbar tip ta’ mħabba li toriġina minn Alla.
Il-mirra tħares lil hinn mit-tbatija u tiffoka fuq il-Qawmien ta’ Ġesù u l-miġja tas-Saltna t’Alla. Il-mirra hija mifhuma bħala interċessjoni, għotja permezz ta’ Ġesù għal ħaddieħor bit-telf tal-kumdità, bis-sawm, bit-tbatija ta’ kuljum, u l-ġenerożità ta’ sagrifiċċju. Bil-mewt dejjem riesqa lejna, ix-xjuħija ġeneralment tkun immarkata minn uġigħ, telf, tbatija, u dgħufija. Dawn jistgħu jiġu trasformati minn niket għal barka, u għalhekk offruti bħala rigal, mhux bħala tbatija. Il-mirra hija assoċjata mal-passjoni u l-mewt ta’ Ġesù bħala tpattija għas-separazzjoni minn Alla permezz tal-qerq tax-xitan, tad-dinja, u tagħna nfusna. Fi tmiem il-ħajja, it-tentazzjoni tista’ tkun li wieħed jqis lilu nnifsu bħala komplut, minħabba li jkun għajjien wisq biex ikompli bil-vokazzjoni Nisranija. Id-don tal-mirra, tax-xjuħija, jmur mal-perseveranza, li hija meħtieġa għad-dixxiplu ta’ Ġesù. Wieħed jiftakar u jafferma mill-ġdid il-vokazzjoni reliġjuża tal-fażijiet bikrija tal-ħajja, li jkompli jsegwi l-wegħda tal-kewkba, filwaqt li jirrikonoxxi l-limitazzjonijiet tal-età. Ix-xjuħija ġġib magħha r-realtà tal-inadegwatezza u l-għanijiet li ma ntlaħqux, anke tal-fallimenti Ii huma inevitabbli. Jista’ xi ħadd jgħid l-aħħar kelma rebbieħa ta’ Ġesù fuq is-Salib, mingħajr ma Ġesù jitkellem permezz ta’ dik il-persuna fl-aħħar siegħa tiegħu? L-għajta tar-rebħa ta’ “Kollox mitmum!” tappartjeni lill-Wieħed, l-Uniku Wieħed, li rebaħ il-mewt. La d-deheb tal-għerf u lanqas l-inċens ta’ ħajja matura ta’ talb u servizz ma jistgħu jibqgħu mingħajr id-don it-twaħħid tal-mortalità tagħna ma’ Sid il-ħajja, Ġesù Kristu, li hu l-armatura tad-Dawl tagħna, id-dawl veru, li jagħti dawl lil kulħadd, li ġej fid-dinja.
U għalhekk, il-Maġi, jingħaqdu mal-etajiet kollha, mal-popli kollha, u jirrappreżentaw il-fażijiet kollha tal-ħajja umana, isegwu l-Kewkba fit-tfittxija tagħhom. Il-pellegrinaġġ ta’ ħajjithom huwa il-pellegrinaġġ tagħna wkoll, għax Ġesù huwa l-Kewkba eterna (Ġwanni 9,13). Bl-umiltà tar-rgħajja u l-privileġġ tal-Maġi, l-umanità tista’ ġġib id-doni tal-ħajja lill-Familja Mqaddsa fuq l-artal tal-maxtura fil-lejl tat-twelid ta’ Ġesù, f’Betlehem, fi stalla, f’kesħa kbira. Nistennew il-miġja tiegħu għad-dħul mill-bieb ta’ qlubna stess, hekk kif nkunu qed ngħallmu liż-żgħar kif jingħaqdu mal-pellegrinaġġ Nisrani ta’ kull età mar-rgħajja u s-slaten, magħqudin mal-Familja Mqaddsa.
Madankollu, hemm twissija fir-rakkont tat-twelid ta’ Ġesù. It- tagħlim falz jew id-“dawl intern” qarrieq bbażat fuq l-egoiżmu, il-jien, li apparti li jifred mill-għaqda mal-Papa, ikompli jifframmenta l-Kristjaneżmu b’numru ta’ setet, kull waħda bi framment tad-dawl divin, iżda li madankollu jikkawżaw kaos u dlam fl-ordni soċjali.
Il-Mulej Ġesù jgħidilna “Min jagħti skandlu lil wieħed minn dawn iċ-ċkejknin li jemmnu fija, ikun aħjar għalih li jdendlulu ma’ għonqu ġebla tat-tħin minn dawk li jdawru l-ħmir, u jgħarrquh f’qiegħ ta’ baħar” (Mattew 18,6). Aħna, li aħna l-Maġi tal-ġurnata tal-lum, il-ġenituri, il-katekisti, u l-għalliema, nirrealizzaw li t-twiddiba ta’ Ġesù hija indirizzata lejna wkoll? Għalhekk, nistennew li d-Dawl ta’ Kristu jitla’, bħall-Kewkba ta’ filgħodu, b’tama u b’imħabba għaċ-ċkejknin li ninkoraġġuhom u nidderieġuhom fix-xewqa tagħhom għall-Ġenna. Fil-Milied, nistennew il-miġja ta’ Alla tagħna, li hu Alla tan-nies, u li jżomm id-dinja f’idejh b’imħabba tenera u preferenza għat-tfal żgħar, li jiġu għandu biex iberikom.
Ruth D. Lasseter
Assoċjata
Indiana, l-Istati Uniti
