Fis-sena tal-Ġublew tat-Tama bit-tema ‘Pellegrini tat-Tama’, ejjew nirriflettu fuq Marija, Omm Ġesù, bħala l-eżempju tagħna ta’ fidi u fiduċja. Il-festa tagħha, taħt it-titlu tal-Madonna tal-Karmnu, iċċelebrata fis-16 ta’ Lulju, tfakkarna li Marija takkumpanjana fil-vjaġġ tagħna, speċjalment meta t-triq quddiemna tkun iebsa u inċerta.
Il-ħajja ta’ Marija kollha kienet ‘iva’ għall-pjan ta’ Alla: mill-“iva” kuraġġuża tagħha fit-Tħabbira mill-Anġlu Gabriel sal-preżenza determinata tagħha f’riġlejn is-Salib. Nistgħu nsejħulha bir-raġun il-Mara tat-Tama, għax il-fidi tagħha baqgħet soda quddiem it-tbatija u l-misteru.
San Ġorġ Preca, li bħala terzjarju Karmelitan ħa l-isem ta’ Patri Franco, jistedinna nimxu fuq l-eżempju ta’ Marija sabiex insiru dixxipli denji ta’ Ġesù. Għalih, Marija ma kinitx sempliċement mara ta’ min jammiraha, iżda fuq kollox ta’ min jimitaha, speċjalment fl-umiltà, is-skiet u l-fiduċja sħiħa tagħha f’Alla. Huwa ħeġġeġ id-devozzjoni lejn il-labtu, ir-rużarju, u, l-aktar importanti, ħajja interna mmudellata fuq tagħha.
Huwa ppromwova d-devozzjoni lejn il-labtu bħala sinjal ta’ konsagrazzjoni lil Marija u sejħa biex wieħed jimita l-virtujiet tagħha. Huwa ħaddan it-tagħlim tal-Papa Piju XII, li ddeskriva il-labtu bħala ‘l-ilbies tal-virtujiet ta’ Marija’ u għalhekk ried li l-membri tas-Soċjetà jibdew jiċċelebraw kull sena il-Programm tal-Virtujiet fl-ewwel Ħadd wara s-16 ta’ Lulju biex iħeġġiġhom jgħixu l-virtujiet nobbli ta’ Marija.
F’waħda mill-kitbiet tiegħu, San Ġorġ Preca jimmaġina lil San Xmun Stock iħeġġeġ lill-fidili: “Ilbsu lil Marija, intom li tħobbuha.” Tabilħaqq, San Ġorġ Preca kien xhud ħaj ta’ din is-sejħa, għax ippriedka bla heda l-imħabba u l-protezzjoni ta’ Marija li tagħtina permezz tal-labtu u ħeġġeġ biex kulħadd jimxi fuq il-passi tagħha.
Bħala pellegrini tat-tama, jalla nimxu ma’ Marija, il-Mara tat-Tama, nħalluha tiggwidana dejjem eqreb lejn binha Ġesù, l-istess bħalma għamel San Ġorġ Preca, bil-fidi, id-devozzjoni u l-kuraġġ.
