Wara li sawm għal erbgħin jum, Ġesù esperjenza l-ġuħ. L-ebda aspett tal-eżistenza umana ma kien barrani għalih. Sfortunatament, anke llum, għadd ta’ nies għadhom ibatu l-ġuħ. Imma x’jorbot is-sawm taʼ Ġesù, is-sawm tagħna, u l-Għid il-Kbir? Għal ħafna minna, l-esperjenza tal-ġuħ f’ħajjitna mhix daqshekk probabbli. Għalhekk, is-sawm jibqa’ għażla personali. Allura, għala għandna nsumu?
Xi wħud isumu għal raġunijiet personali, fosthom is-saħħa jew l-isport. Dawn huma motivazzjonijiet leġittimi. Madankollu, is-sawm jista’ wkoll jgħaqqadna mal-misteru tal-Għid. Xi wħud isumu biex jaqsmu l-ikel mal-foqra; oħrajn jagħmlu dan b’solidarjetà ma’ min hu bil-ġuħ.
Madankollu, dawn l-intenzjonijiet nobbli ma jagħutunix stampa kompleta tar-raġuni tas-sawm taʼ Ġesù. Ġesù għażel liberament li jsum biex jieħu sehem fit-tbatija umana. L-effetti tal-ġuħ imorru lil hinn minn dak li hu fiżiku u jmissuna fil-fond ta’ qalbna. Is-sawm joħloq fina vojt, jesponi l-ġrieħi moħbija tagħna, u jagħmilna aktar vulnerabbli. Is-sawm u l-ġuħ jistgħu jġibu fina trasformazzjoni ġenwina.
Il-ġuħ qatt mhu mingħajr l-isfidi tiegħu, għax flimkien miegħu jitfaċċaw xewqat u tentazzjonijiet oħra. Fid-deżert, Ġesù ffaċċja t-tentazzjoni tas-suċċess, tal-fama, u tal-poter. Il-ġuħ jesponi xewqat moħbija fina u jġiegħla naffaċjaw dak li ħafna drabi nfittxu li ninjoraw. Ħadd ma jsum mingħajr konsegwenzi, lanqas Ġesù.
Madankollu, din kienet il-missjoni tiegħu. Ġesù ma riedx jeqred ix-xewqat u t-tentazzjonijiet kollha imma ried li jġarrabhom biex b’hekk jasal in-naħa l-oħra tax-xewqat tagħna: “Imqar jekk nimxi f’wied mudlam, ma nibżax mill-ħsara, għax inti miegħi”. Dan hu l-ġuħ u l-għatx għal Alla. Ġesù wriena li s-sawm mhuwiex għan fih innifsu imma triq li twassalna mid-dlam għad-dawl. Alla jixxennaq għalina, u aħna nixxenqu għalih.
