B’differenza minn dawk il-miti ta’ reliġjonijiet pagani bikrin dwar il-ħolqien, fejn il-vjolenza bejn allat irrabjati kienet teħtieġ paċifikazzjoni jew tixħim, ħafna drabi permezz ta’ sagrifiċċji bid-demm, l-Iskrittura Mqaddsa hija profondament differenti. Il-Ġenesi tirrepeti b’kor ferrieħi l-bidu tas-sbuħija divina fil-ħolqien: “…U Alla ra kulma kien għamel, u ara, kollox kien tajjeb ħafna.”
Ir-rakkont tal-Ġenesi juri wkoll li l-bnedmin inħolqu biex igawdu l-kumpanija tal-Ħallieq tagħhom, biex jitgħaxxqu bil-ħolqien, flimkien ma’ Alla tagħhom. Tabilħaqq, anke llum, meta jħarsu lejn il-mikroskopju elettroniku, ix-xjenzati jistagħġbu bl-iżgħar nanopartiċelli. L-akbar ħlejjaq ħajjin għandhom ukoll il-parti tagħhom fil-ħolqien qaddis. Il-baleni kbar jistgħu jinżlu aktar minn mil fil-fond iswed tal-oċejan, imbagħad jerġgħu jitilgħu fil-wiċċ biex jieħdu n-nifs u jissoċjalizzaw ma’ oħrajn tal-istess speċi. Billi jqiegħdu rashom qrib il-wiċċ u ġisimhom wieqaf dritt, il-baleni jorqdu flimkien fi gruppi bla ma jiċċaqalqu, bħal masġar siġar sospiżi fl-ilma u mmexxi mill-imwieġ.
Tul iż-żminijiet kollha, flimkien mal-astrologi u x-xjenzati naturali, għadd bla qies ta’ artisti – awturi, poeti, kompożituri ta’ innijiet u pitturi – jibqgħu joħolqu flimkien ma’ Alla, li jagħmel kollox sabiħ fi żmienu! Anke l-blat bla ħajja jfaħħar lil Alla fil-fdalijiet fossilizzati tiegħu ta’ 300 miljun sena ilu fl-Era Karbonifera tal-ħolqien; xejn ma jintilef fil-ħażna ta’ mħabba eterna ta’ Alla. F’ritorn perpetwu, il-basal tan-narċissi midfuna fl-art iġibu s-sbuħija tagħhom ’il fuq; minn taħt is-silġ tax-xitwa, il-fjuri sofor tagħhom jitfaċċaw kull sena u għal dejjem, kollha jħabbru: “Ir-rebbiegħa tibda llum, għax Kristu qam, u l-art kollha qed tiċċelebra.”
Madankollu, lil hinn mis-sbuħija ta’ Alla fin-natura, huwa fid-dimensjoni sopranaturali fejn toriġina l-aktar sbuħija profonda. L-Evanġelji, bħall-baleni kbar, jinżlu fil-fond tal-ħniena ta’ Alla u jirreġistraw fir-rakkonti Bibliċi kollha l-għeġubijiet tal-istorja tas-salvazzjoni. Hemmhekk, fid-dlam tal-misteru, il-kapolavur tal-ħniena ta’ Alla għall-bniedem jitnissel fil-Kunċizzjoni Immakulata ta’ Marija, li hija ħabbara tal-Inkarnazzjoni, bħan-narċis tar-rebbiegħa.
Il-Verb ta’ Alla, Ġesù Kristu, jfakkarna fil-Ġenesi. F’dik il-laqgħa bejn id-divin u l-uman, meta l-Arkanġlu Gabrijel deher lil Marija u bil-“Fiat” tagħha, id-dinja ġiet maħluqa mill-ġdid, u l-milja tas-sbuħija divina fil-vokazzjoni umana ġiet żvelata fl-ewwel forma tagħha, il-Causa Nostrae Laetitiae. Marija fil-Kunċizzjoni Immakulata tagħha hija tassew il-kawża tal-ferħ tagħna, billi ġġorr fi ħdanha kemm id-divinità kif ukoll l-umanità ta’ Ġesù li kien għadu ma twelidx.
Ġesù, li hu l-Ħajja nnifisha, iġorr fih kemm in-natura umana kif ukoll dik divina. Il-Knisja, ħierġa mill-pjagi divini ta’ Kristu u mħejjija mill-maternità divina ta’ Marija, tistieden lill-bnedmin kollha għall-ħajja sopranaturali. L-ewwel nett, fil-Magħmudija, il-Knisja tistieden lill-bniedem jirċievi dak li ma jistax jintlaħaq waħdu, lanqas bl-aktar sforzi qawwija tagħna: innoċenza tar-ruħ u natura ppurifikata, imnaddfa minn kull residwu tossiku fil-wirt spiritwali u anke ġenetiku tagħna.
San Ġorġ Preca kiteb innu sabiħ ħafna lill-Madonna fil-“Vestis Honoris”. Alla għażel lil Marija. Jekk naċċettaw l-imħabba ta’ Ġesù u nonoraw lil ommu qaddisa, id-dwejjaq tad-dnub u t-tirannija tal-vjolenza jistgħu bil-mod il-mod jingħelbu bil-preżenza tiegħu fina. “Alla ħalaq lill-bniedem fuq xbieha tiegħu… u kien tajjeb ħafna.”
Sinjur tagħna, itlob għalina.
Ruth D. Lasseter
Assoċjata
Indiana, l-Istati Uniti
