Il-kliem “Jiena r-Ragħaj it-Tajjeb” mill-Evanġelju ta’ San Ġwann (Ġw 10,11) għandhom valur kbir ħafna fil-fidi Nisranija. Ġesù jippreżenta lilu nnifsu bħala ragħaj, iżda mhux sempliċiment ragħaj li jmexxi n-nagħaġ tiegħu, iżda ragħaj li jagħraf lil kull nagħġa b’isimha u b’mod profond. Hu l-ħabib li lest li jagħti ħajtu biex jipproteġihom. Ir-ragħaj it-tajjeb huwa dak li jagħraf il-ħtieġa ta’ kull nagħġa, u jagħmel kollox, anke sagrifiċċji kbar, biex jiżgura li jiġu protetti.
Il-figura ta’ Ġesù bħala r-ragħaj tagħti sens qawwi ta’ sigurtà, speċjalment meta nħossuna mitlufin jew mingħajr direzzjoni. Fil-ħajja ta’ kuljum, ħafna nies iħossuhom imbeżżgħa jew waħedhom, speċjalment meta jgħaddu minn sfidi jew mumenti ta’ inċertezza. Madankollu, il-kliem ta’ Ġesù jagħtina tama kbira. Hu jgħidilna li lest li jieħu ħsiebna u li aħna m’aħniex waħedna fl-isfidi tagħna. Il-kliem “Jiena r-Ragħaj it-Tajjeb” huwa stedina biex nemmnu li, kif ragħaj jieħu ħsieb il-merħla tiegħu, hekk ukoll Ġesù jagħti ħajtu għan-nagħaġ tiegħu.
Ir-ragħaj it-tajjeb mhux biss figura li tmur quddiem l-merħla biex tmexxi. Huwa magħruf għall-imħabba tiegħu, għall-kuraġġ u għal-lealtà tiegħu. Il-ħajja li jagħti għan-nagħaġ tiegħu tfisser li l-missjoni tiegħu hija waħda ta’ ġid u għajnuna. Bħal ragħaj, Ġesù mhux biss imexxi, iżda jimmudella l-mod kif għandna nkunu lkoll ma’ xulxin. Aktar minn hekk, għandna nimitaw il-karattru ta’ dan ir-ragħaj it-tajjeb. Dan ifisser li nkunu lesti li nuru l-ħniena u l-imħabba lejn dawk li huma fil-bżonn, bħar-ragħaj li jagħraf lil kull nagħġa tiegħu. Nappoġġjaw, inħobbu, noffru sigurtà, u jekk hemm bżonn nagħmlu sagrifiċċju wkoll.
Fl-aħħarnett, il-messaġġ ta’ “Jiena r-Ragħaj it-Tajjeb” hu stedina għall-umiltà, għall-mudell ta’ mħabba mimlija sagrifiċċju, u għall-kuraġġ li nagħtu lil dawk li jersqu lejna. Meta l-ħajja tpoġġi ħwejjeġ diffiċli quddiemna rridu niftakru li għandna lil xi ħadd li jmexxina b’qalb u ħniena, u li hu lest jagħti kollox għalina. Din hija l-fidi vera, il-fidi li tistqarr li l-imħabba ta’ Ġesù hija eternament preżenti.
Sam Schembri
Kandidat
