Żjara fil-Qasam ta’ Julio C. Tello (Il-Perù)
23 August, 2026
Fil-21 ta’ Awwissu 2026, is-Superjur Ġenerali u l-Assistent Superjur Ġenerali temmew iż-żjara tagħhom fil-Qasam ta’ Julio C. Tello f’Lurín, il-Perù. Iż-żjara bdiet fit-13 ta’ Awwissu, meta ngħataw merħba sabiħa mit-tfal u l-adolexxenti li jattendu regolarment fil-qasam. L-għada, il-membri tal-Grupp San Ġorġ Preca organizzaw ukoll laqgħa ta’ merħba.
Nhar is-Sibt, 15 ta’ Awwissu, is-Superjur Ġenerali u l-Assistent tiegħu ngħaqdu mal-adolexxenti għal ħarġa, li matulha kien hemm ħin ta’ rikreazzjoni flimkien, logħob bil-ballun, u titjir tat-tajr.
L-għada, il-Ħadd 16 ta’ Awwissu, ġie organizzat seminar ta’ nofstanhar għall-membri u l-kandidati, il-grupp femminili u l-membri tal-Grupp San Ġorġ Preca. Is-sessjonijiet iffukaw fuq żewġ temi importanti: L-Intenzjoni Retta, virtù li kienet partikolarment għal qalb San Ġorġ Preca, u Is-Sejħa Universali għall-Qdusija.
Matul iż-żjara tagħhom, is-Superjur Ġenerali u l-Assistent Superjur Ġenerali ħadu sehem f’diversi laqgħat mat-tfal u l-adolexxenti, kif ukoll mal-kandidati u l-membri, li offrew opportunitajiet ta’ formazzjoni, riflessjoni u fraternità.
Il-programm tagħhom inkluda wkoll żjara fil-kappella ddedikata lil San Duminku ta’ Manchay, li tagħmel parti mill-Parroċċa Santa Rosa ta’ Manchay. F’din il-kappella il-membri jagħtu sehemhom fil-formazzjoni kateketika tat-tfal. Huma żaru wkoll l-Istitut Edukattiv San José del Sur, fejn wieħed mill-membri jagħmel parti mill-amministrazzjoni tal-iskola.
Nhar l-Erbgħa, 19 ta’ Awwissu, il-membri tal-Grupp San Ġorġ Preca organizzaw laqgħa ferriħija fil-qasam li nkludiet mumenti ta’ talb u riflessjoni. Dawk preżenti qasmu messaġġi ta’ radd il-ħajr lil Alla għaż-żjara u qasmu ħin ta’ fraternità flimkien.
Nhar il-Ħamis, 20 ta’ Awwissu, saret l-aħħar laqgħa għat-tfal u l-adolexxenti, li matulha kellhom l-opportunità jistaqsu mistoqsijiet dwar is-Soċjetà u fl-aħħar ħadu xi ħaġa tal-ikel flimkien.
Matul iż-żjara kien hemm ukoll il-membri Jeremy Zammit u Luke Mizzi li kienu qed jagħmlu esperjenza missjunarja fil-Perù.
Iż-żjara offriet bosta opportunitajiet ta’ talb, formazzjoni, rikreazzjoni u fraternità, filwaqt li kompliet issaħħaħ ir-rabtiet bejn l-amministrazzjoni ġenerali u l-komunità ta’ Lurín.
