Proclaim26 (St Albans)
11 July, 2026
Fis-27 ta’ Ġunju 2026, il-membri tal-qasam ta’ St Albans, flimkien ma’ diversi membri tal-grupp tal-liturġija tal-Parroċċa ta’ Holy Eucharist, ġew mistiedna mill-istess parroċċa biex jieħdu sehem fi Proclaim26, seminar ta’ jumejn organizzat mill-Arċidjoċesi ta’ Melbourne.
Is-seminar tmexxa minn Sherry Weddell, ko-fundatriċi u Direttur Eżekuttiv ta’ Catherine of Siena Institute. Weddell hija l-awtriċi ta’ diversi kotba, fosthom il-ktieb popolari Forming Intentional Disciples: The Path to Knowing and Following Jesus, li jittratta l-evanġelizzazzjoni u l-formazzjoni tad-dixxipli fis-seklu wieħed u għoxrin. Flimkien mal-kollaboraturi tagħha, ħadmet ma’ aktar minn 225,000 membru tal-kleru Kattoliku, mexxejja reliġjużi u gruppi parrokkjali f’aktar minn 1,000 parroċċa f’230 djoċesi madwar id-dinja.
Bħala waħda mill-aktar vuċijiet magħrufa fil-qasam tad-dixxipulat Kattoliku, Weddell ħeġġet lill-parroċċi jqiegħdu l-evanġelizzazzjoni fil-qalba tal-missjoni tagħhom. Hija enfasizzat li l-akbar teżor tal-Knisja mhumiex il-binjiet jew l-istituzzjonijiet tagħha, iżda l-poplu tagħha, li kull wieħed minnu huwa msejjaħ biex jibni relazzjoni personali ma’ Ġesù Kristu. Fakkret lill-mexxejja parrokkjali li kull persuna mgħammda għandha missjoni unika mogħtija minn Alla, imfassla skont id-doni, l-esperjenzi u t-talenti tagħha. Ħadd m’għandu jitqies biss bħala voluntier għall-ħidmiet tal-parroċċa, iżda bħala dixxiplu u appostlu mibgħut biex iwassal l-imħabba ta’ Kristu lid-dinja. Hija ħeġġet lill-komunitajiet tal-Knisja jrawmu din is-sejħa sabiex kull persuna tiskopri is-sehem tagħha fil-missjoni ta’ Kristu u tagħti frott li jibqa’.
