Niċċelebraw il-Fundatur (St Albans)
10 May, 2026
Nhar l-Erbgħa 6 ta’ Mejju 2026, il-qasam ta’ St Albans organizza Quddiesa biex tfakkar lil San Ġorġ Preca fil-Knisja ta’ Holy Eucharist. Numru sabiħ ta’ familji, parruċċani u membri kienu preżenti. Patri Robin Lomangkok CSsR iċċelebra l-Quddiesa u qasam kif il-fatt li San Ġorġ Preca, ta’ 15-il sena, qara l-ktieb Preparazzjoni għall-Mewt ħalla impressjoni kbira fuq il-ħajja spiritwali tiegħu. L-awtur ta’ dan il-ktieb, San Alfons de Liguori, huwa l-istess fundatur tal-kongregazzjoni li jappartjeni għaliha Patri Robin stess. Matul l-omelija ntwera filmat qasir li enfasizza l-wirt ta’ San Ġorġ Preca u l-importanza li napprezzaw l-appostolat tas-Soċjetà għat-tixrid tal-Evanġelju.
Il-kor taż-żgħażagħ, megħjun minn Michael Sammut u Noel Debono, anima l-Quddiesa b’mużika u innijiet.
Fi tmiem il-Quddiesa tqassmu santi ta’ San Ġorġ Preca bħala tifkira tal-okkażjoni.
Interessanti li għall-Quddiesa attenda raġel anzjan Malti, li missieru kien in-neputi ta’ San Ġorġ Preca.
Wara l-Quddiesa, kien hemm ħin ta’ fraternità ppreparat mill-ġenituri tat-tfal li jattendu l-qasam.
Imbagħad, nhar il-Ġimgħa 8 ta’ Mejju sar kwizz interessanti fuq il-ħajja ta’ San Ġorġ Preca għat-tfal li qegħdin minn Grade 5 u ’l fuq. Il-parteċipanti ħejjew billi studjaw għaxar stejjer mill-ktieb Called to be Holy, għalkemm ħafna minnhom qraw il-ktieb kollu b’entużjażmu biex japprofondixxu l-għarfien tagħhom dwar il-qaddis. It-timijiet tal-kwizz, immexxija minn Benjamin, Wilroy, Gloria u Quynh, ħadmu fi spritu ta’ tim u kompetizzjoni sabiħa matul is-serata. Fl-aħħar tal-attività, il-parteċipanti rċevew xi tifkiriet, fosthom keyrings, bookmarks u karti tat-talb.
Sadanittant, it-tfal iż-żgħar irċevew kotba tat-tpinġija dwar San Ġorġ Preca u tgħallmu aktar dwar ħajtu flimkien mal-katekisti tagħhom. Iċ-ċelebrazzjoni spiċċat b’ikla speċjali ppreparata mill-ġenituri.
Nhar is-Sibt 9 ta’ Mejju, jum il-festa ta’ San Ġorġ Preca, iż-żgħażagħ inġabru għal programm speċjali ta’ riflessjoni aktar profonda fuq il-ħajja u l-missjoni ta’ San Ġorġ Preca. Ingħatat attenzjoni partikolari għall-umiltà tiegħu, iż-żelu u l-entużjażmu tiegħu għat-tixrid tal-Evanġelju. Matul il-laqgħa ġie enfasizzat li Alla għadu qed isejjaħ membri ġodda biex jiddedikaw ħajjithom għall-missjoni mwaqqfa minn San Ġorġ Preca, u li ħadd m’għandu jibża’ jwieġeb b’ġenerożità għal din is-sejħa. Il-laqgħa spiċċat b’Kahoot kwizz dwar il-ħajja ta’ San Ġorġ Preca, imħejji minn wieħed miż-żgħażagħ, filwaqt li l-parteċipanti kielu flimkien.
