Mariapolis 2025 (Lipa)
05 May, 2025
Fuq l-istedina tas-Sa Mary Ann Tolentino minn Lipa, is-soċji attendew għall-aħħar sessjonijiet tal-Mariapolis 2025, organizzati għall-komunitajiet tal-Moviment tal-Fokolari mill-gżira ta’ Luzon. Din l-esperjenza saret bejn l-1 u l-4 ta’ Mejju 2025 fiċ-Ċentru għall-Irtiri ‘Angels Hills’ fil-belt ta’ Tagaytay, u l-membri attendew għal-laqgħat tal-Ħadd, 4 ta’ Mejju 2025.
It-tema magħżula għal din is-sena kienet Il-Qrubija: l-Istil ta’ Alla. Din kienet żviluppata permezz ta’ diversi indirizzi, fosthom fil-forma ta’ djalogu kif ukoll minn numru ta’ esperjenzi ta’ xhieda li nqasmu mill-membri tal-komunità stess. Il-parteċipanti għall-Mariapolis ġew minn firxa wiesgħa ta’ pajjiżi, fosthom mir-Renju Unit, l-Italja, l-Olanda, il-Lussemburgu, ir-Russja, l-Awstralja, Myanmar u l-Uganda. Waqt l-inkontri li saru, ġie apprezzat l-ispirtu qawwi ta’ fraternità u l-impenn għall-paċi. Dan offra opportunità prezzjuża għall-membri tas-Soċjetà biex ikomplu joħolqu u jsaħħu l-konnessjonijiet mal-Moviment tal-Fokolari fil-Filippini.
Għall-aħħar sessjoni, attenda wkoll l-Eċċellenza Tiegħu Charles John Brown, in-Nunzju Appostoliku għall-Filippini. Huwa kkonċelebra l-quddiesa tal-għeluq flimkien ma’ diversi saċerdoti Fokolarini, fosthom Andrew Camilleri, li ilu jservi fil-komunità ta’ Tagaytay għal dawn l-aħħar snin. Fi tmiem il-quddiesa, is-soċji sellmu lin-Nunzju, li ftakar bil-qalb iż-żmien li kien qatta’ fl-Albanija, fejn kien ħadem mal-membri tas-Soċjetà ġewwa Korçë.
Nirringrazzjaw lil Alla u lill-komunità tal-Fokolari għal din l-esperjenza sabiħa u fraterna!
